ـــــــــــــــــــــــــــــــــــــــــــــــــــــــ
تحية لكل الواعين لمصلحة مصر
إئتلاف شباب الثورة ... الإخوان المسلمين ... د محمد البرادعي ... نوارة نجم ... بلال فضل ..شباب 6 إبريل ..
وكل من تبنى مطالب جمعة أمس التسعه ولم يحيد عنها وانتقد التحريض علي مواجهة الجيش من بعض الجاهلين سياسيا أو بعض المخربين أو حتى المتآمرين ولم يكن جزءا منه ...
ـــــــــــــــــــــــــــــــــــــــــــــــــــــــ
مبسوط ياروح امك ؟
لكل من حرض طوال الأسبوع اللي فات علي عمل مواجهة مع الجيش اسمحلي اقولك مبسوط ياروح امك ؟
شوية عيال عيب أقول عليهم نشطاء سياسيين ولا زفت لإن كلمة ناشط سياسي تعني شخص لديه وعي سياسي " ببساطه كده عارف يعمل إيه ويعمله إمتى ..وإيه اللي يتعمل دلوقتي وإيه اللي يتعمل بعدين ،،،
مش مجرد اراجوز بيقلد أي ستاتيس تعجبه علي الفيس بوك ..
الناس تكتب الشعب يريد إقالة المشير يروح كاتبها ،
الناس تكتب ده فيديو لضباط مصر الأحرار يروح مشيره ويقول ربنا يحميكم يارجالتنا !!!!!!!!!!! رجالة مين بس الله يسامحك ...
الناس تكتب المشير طنطاوي خاين وسامي عنان لازم هو اللي يمسك الجيش " رغم إني مش عارف هو عرف منين إن سامي عنان وحش أو حلو أصلا " المهم يروح كاتب زي ما الناس بتكتب وخلاص ،،،
الناس تقول الجيش والشعب إيد واحده يقول وراهم ،
يقولوا الجيش خان الشعب يقول وراهم ،
يقولوا جواز سنية من سفروت باطل يقول وراهم .
المهم سياسة القطيع متفوتهوش منها ولا نقطه زي ما الناس تقول يقوووووووووووووووووووووووووووووووووووووووووووووووول
ـــــــــــــــــــــــــــــــــــــــــــــــــــــــ
ظباط أحرار !!!!!
شوية عيال ولاد تييييييييييييييت لا حنا عارفين ليهم أصل من فصل يطلعوا يصوروا نفسهم فيديو ويقولوا إحنا إئتلاف ضباط الجيش الأحرار " إحرار مين ياعنيا قول تاني كدا !
يروح بردو قايل وراهم أه والله باين عليهم أحرار فعلا !!!!!!!!!!!!!!!!!!!!!!!!!
طيب ياغبي يابن الناس الطيبين مخدتش بالك إن بعد الفيديوهات إتضح إن البشوات موجودين برا مصر أصلا مش فمصر ؟
عندك دليل إنهم ضباط جيش ؟
عندك دليل علي إن عندهم ضمير وبيخافوا علي مصر ؟
عندك دليل إنهم مش مفصولين من الخدمة بسبب جرائم أخلاقيه مثلا ؟
عندك دليل أصلا إن دول ظباط أو حتى كانوا ضباط في الجيش ؟
ـــــــــــــــــــــــــــــــــــــــــــــــــــــــ
بعض الجهال يطلعوا يقولوا علشان الثورة تكمل لازم نواجه الجيش وننضفه
" أنا عمري بصراحة في كل كتب التاريخ اللي قرأتها ما قرأت عن مدنيين بينضفوا مؤسسة عسكرية جديده دي الحقيقه "
المهم ...
زي الأهبل وخلاص لازم نواجه الجيش علشان الثورة تبقى ثورة بجد !!!!!!!!!!!
تقصد لازم تدي المجلس العسكري بتهورك وغباءك المبرر والمنطق والذريعه لحكم مصر حكم عسكري وإعلان أحكام عرفية بجد بقه مش من بتاع جمال ولا أنور ولا مبارك .
وعلي فكره الأغلبيه الصامته اللي قالت نعم للتعديلات بسبب هبلك الخوف من المستقبل الهباب هيخليها تخرج بنفسها تطالب العسكر بحكم مصر علشان البلد تستقر
هو ده اللي إنت عايزه ؟ مبسوط ياروح أمك ؟ مبسوطه ياروح أمك ؟
حرام عليكم نشطاء سياسيين إيه بس وزفت إيه !!!!
ـــــــــــــــــــــــــــــــــــــــــــــــــــــــ
تعالى أشرحلك يعني إيه سياسه يمكن تفهم الله يهديك
سياسة يعني فن الممكن ....
إنت توجهك إسلامي ؟ سلفي يعني أو إخوان مسلمين ؟
طب النبي صلى الله عليه وسلم في صلح الحديبية قال للصحابه هنروح نعمل عمره فالمشركين منعوه من دخول مكه ..
ومقدرش هو والصحابه يعملوا العمره وجلس في صلح الحديبيه وجالوا أكتر من متفاوض اللي يشد النبي صلي الله عليه وسلم من لحيته واللي يقوله إمسح بسمك اللهم لا نعرف إلهك ولا إله أباءك والنبي يأمر علي بمسحها ...
واللي يتطاول واللي يشتم والنبي تحمل كل ده وتحمل كل الشروط المجحفة لصلح الحديبية تجاه المسلمين لإنه سياسي محنك يعرف أن المكاسب الكبيره ولو بعيده أهم من المكاسب الصغيره ولو قريبة والتي تعقبها الخسائر الغير معلوم مداها ولا عواقبها وبالفعل دخل المسلمون مكه بعدها فاتحين بسنوات قليلة وتحقق الإنتصار ....
هي دي السياسة ..
ـــــــــــــــــــــــــــــــــــــــــــــــــــــــ
السياسة يعني اللي مقدرش اقتله علشان مسنود أجي قدامه واشد الجاكيت من الناحيتين علشان يشوف إني معايا مسدس واعمل اني مش واخد بالي فيعملي اللي انا عايزه وميتعاملش معايا علي إني ضعيف
............
واللي منقدرش نقتله هو المجلس العسكري لإنه كيان بيحتوي كل قادة الجيش المصري الأصيل اللي وقف معانا فثورتنا وحماها " رغم كل التحفظات لي علي المجلس "
ولكن لن ننسي أبدا له أنه حمى ثورتنا ولم يضرب طلقة واحده علي مصري في ميدان التحرير أو أي ميدان أخر...
ومنقدرش نقتله بردو لإنه قوي وقوي جدا مش ضعيف وولو قتلته يبقى علي مصر السلام لإن بلد بدون جيش زي الفيلا اللي من غير بوابه الكل يسرقها ..
بلد من غير جيش متماسك زي البنت العريانه اللي مرمية علي قارعة الطريق اللي رايح ينتهك عرضها واللي جاي يضربها بسكينة والاتنين يخلصوا ويغتصبوها ويصوروها ويموتوها ويمثلوا بجثتها كمان ....
طيب إيه الحل ؟
الحل إني أوريله إن معايا مسدس علشان يعرف إني مش ضعيف وده اللي حصل إمبارح في ميدان التحرير وكل ميادين مصر وكان المسدس اللي وريناه للمجلس العسكري هو أعدادنا اللي بالملايين وضغطنا عليه وعرفناه إن الثورة منتهتش ...
لزمته إيه بقه أم الهبل ده ؟ وازاي نسمح لعسكريين يدخلوا بينا في مظاهره المفروض إنها مدنية ؟
تاني ... شوية االظباط الخونه بتوع امبارح دول خايفين يتظاهروا لوحدهم فيوم منفصل ليه ؟
جايين يتحاموا في المدنيين ويعرضوا حياتهم للخطر ليه ؟
ولما اعتصموا بالليل كانوا فقلب الخيم والمدنيين هم اللي واقفين برا الخيم بيحموهم ليه ؟
سايبين المطالب التسعه اللي أولها محاكمة مبارك وطالعين يشتموا في المشير ليه ؟
لما هم ولاد حلال كدا كانوا فين من أول الثورة لما الناس كانت بتموت علي إيد الشرطة وكان كل دقيقه واحد يموت ليه ؟
ـــــــــــــــــــــــــــــــــــــــــــــــــــــــ
إنت ليبرالي ؟
طب الليبرالي المفروض عارف إن قوانين العسكر تختلف عن المدنيين ولا يجوز أن يسمج المدنيين بنزول بعض العسكر بينهم واستخدامهم للمدنيين كدروع بشرية وهم يعرفون أن الشرطة العسكرية بين الحين والآخر هييجوا ويضربوا بالذخيره الحيه وهيقبضوا علي الظباط المعتصمين وأكيد هيروح خلال الإشتباكات ضحايا مدنيين !!!
...........
طب الظباط اللي نزلوا التحرير وهم عارفين إن ده اللي هيحصل يبقى أصلا ظباط خاينين وميستاهلوش الإحترام لإنهم بيحتموا في المدنيين وبيعرضوا حياتهم للخطر ،
ولإنهم بيخالفوا صريح القوانين العسكرية في كل العالم بما فيها أكبر الدول ديموقراطية في العالم ...
هم دول الظباط الأحرار اللي حضرتك بتدافع عنهم ؟
ـــــــــــــــــــــــــــــــــــــــــــــــــــــــ
تخيل معايا كدا ...
إن لما يكون حصل إنفلات أمني من شهرين تقريبا ولحد دلوقتي الناس مش حاسة بالأمان " أقصد طبعا أختي واختك وامي وامك والناس اليتامي والضعاف مش حضرتك ياسبع البرومبا "
لحد دلوقتي من شهرين والبلطجية بيسيحوا في أرض مصر زيهم زي السياح بالظبط .. " كان دور حضرتك إيه ؟ "
والمدارس بيضرب قدامها نار ... " كان دور حضرتك إيه ؟ "
والمستشفيات بيتم التعدي علي المرضي اللي فيها والدكاتره وحوادث قتل واغتصاب وبلطجة من كل نوع " حضرتك كان دورك إيه يامازنجر زمانك قولي بس ؟ "
كنت قاعد تكتب إستاتيوسات علي الفيس بوك بتطالب فيها الشباب إنهم يواجهوا الجيش ويحرروا مصر؟
والحال متعدلش ويعالم هيتعدل إمتى ....
طيب دي الشرطة طيب تخيل الجيش هو اللي نقسم وينسحب من الشوارع وجنودنا اللي القرآن وصفهم بخير أجناد الأرض يتقاتلوا ضد بعض ويموتوا بعض تخيل ونبي معايا السيناريو ده لو سمحت ..
.......
§ الناس تطالب بإقالة المشير .
§ ينقسم الشارع المصري زي ما هو حاصل دلوقتي بالظبط ولا يستجيب المشير ولا المجلس العسكري فيزيد الضغط ولا يستجيب المجلس العسكري فيزيد ويزيد الضغط وينقسم الثوار علي أنفسهم .
§ ينتقل الإنقسام لداخل المؤسسة العسكرية الشريفة المصرية التي لم يسجل عليها التاريخ لحظة خيانة واحده ضد هذا الشعب الطيب الكريم الأبي ..
§ ييجي شوية قيادات أركان حرب وخلافه بكتاءبهم ينشقوا ويعلنوا إنضمامهم لمطالب الثوار أو بمعني أدق المطالبين بإقالة المجلس العسكري والمشير
§ يروح الناحية التانيه شوية قياادات بردوا أركان حرب وخلافه مؤيدين لبقاء المشير والمجلس العسكري ...
§ دول يستقطبوا فرق القوات الخاصه والمظلات والمدفعية فصفهم والتانيين يستقطبوا المشاه والصاعقة وقوات مكافحة الإرهاب والحرس الجمهوري لصفهم
§ يبدأوا ينسحبوا من الشوارع ... ينسحب الجيش المصري من علي الحدود ويتركها عاريه
§ تبدأ المواجهات بين إخواتي واخواتك في القوات المسلحة وكل جندي بيطيع أوامر قائده ويقتل أخوه ، وييبدأوا يحاصروا مقرات بعض والمدفعية تشتغل
§ والشرطة نصها غايب عن الشارع والنص الحاضر يبدأ يضرب نار حي في الشوارع في محاولات السيطره علي الشارع اللي هتسيل فيه الفوضي والبلطجة
§ كل أعضاء الشرطة وأمن الدولة المفصولين واللي أهينوا في الثورة واللي بيتحاكموا وفلول الحزب الوطني والفاسدين من رجال الأعمال اللي كانوا منتظرين محاكمتهم في أي لحظة ينزلوا بأسلحتهم وبلطجيتهم للشوارع ينتقموا لكبرياءهم ..
§ حوادث خطف واغتصاب والأقسام تتكسر فالشرطة تهرب ، والمساجين والمسجلين يهربوا ،فاخواتي واخواتك ياإما يتحبسوا فقمقم وننزلهم الأكل بحبل فقعر القمقم ، ياإما يخرجوا وعيني عينك يتم اغتصابهم في الشوارع وتصويرهم ومفيش مانع من قتلهم والتمثيل بجثثهم كمان
§ تتوقف كل مظاهر الحياه في مصر العمل في المصانع والشركات والبورصه والبنوك وكافة أشكال العمل " فاكر العراق أول ما صدام سقط فاكر اللقطات اللي كان التليفزيون بيجبها رغم إن العراقيين شعب غني جدا تخيل بقه كدا ونبي معايا مصر واديني كام لقطة وحياة عنيك ياشيخ " مش مشكله "
§ المشكله الناس اللي بيمثلوا 15 مليون مصري اللي شغلهم باليومية وقاعدين فبيوتهم أصلا دلوقتي بقالهم شهرين تقريبا وضيف عليهم كام شهر لحد ما يوصلوا إن القرشين اللي محوشينهم اتصرفوا كلهم فيبدأوا يفكروا كدا بالليل وهم باصين في السقف نعمل إييييييييييييييييييييييييييييييييييييييييييه ؟
آآآه مفيش شرطة والجيش بيموت فبعضه فيبدأوا في عمل جماعات البلطجة الشعبية
يكونوا مجموعات ويقسموا المناطق ياحج وخد عندك بقه انت عارف الباقي ، وكل شعب مصر عاش الفتره دي يومين بالظبط تخيل انت بأه ونبي لما نعيشها كلنا شهور ويمكن سنين ....
مستغرب علي فكره الكلام ده حصل بالنص في الأرجنتين لمدة سنة كاملة لنفس الأسباب سنه كاااااااااااااااااااملة قتل واغتصاب وسرقة في قلب الشارع
إلى أن أعلنت الأرجنتين عن إفلاسها رسميا
§ المهم طبعا ده لما يحصل أنا واحد قاعد في السعودية هنزل واسيب شغلي علشان أدافع عن أهلي وغيري سبعه مليون مصر في خلال شهور هيكونوا فمصر علشان يحموا أهاليهم وبيوتهم وممتلكاتهم خسرنا دخل سبعة مليون أسره خلال شهور غير العاطلنين فمصر غير توقف تحويل العملة الصعبة من المصريين بالخارج لإن مش هيبقي في مصريين بالخارج أصلا والسياحه طبعا ميته فكام شهر ونشرب من النيل وناكل ورق شجر...
§ خد عندك شويه فتن طائفيه يولع فيها أحياء وقري ومدن بكاملها ....
ده وحدودنا معليهاش حد لا من ناحية ليبيا ولا من ناحية السودان ولا من ناحية إسرائيل
ولا في شرطة
ولا في أي إنتاج من أي نوع
ومخزون السلع الأساسية يقل يقل يقل لحد ما ينفذ
ما فيش فلوس تشتري أصلا
§ حرب أهلية علي الغذاء والدواء والماء ممكن تقعد سنين ....................................
§ لو حضرتك لما جيت تحرض الناس طول الأيام اللي فاتت ضد الجيش أخدت فحسبانك كل السياناريوهات المتوقعه واللي أنا قولتهالك فوق دي واللي حصلت فأكتر من بلد بنفس الشكل وبنفس السيناريو ! ...
يبقى أانا أسف وأنا اللي غلطانلك وانا المحقوق لك وانا اللي ابن كلب غبي وحمار ومندس ومعايا أجنده وطماعان في وظيفة ميري واللي انت عايزه فيا اعمله ....
ليست هناك تعليقات:
إرسال تعليق
اترك تعليقك هنا ...