أنا آسف ياعم حسن ...رابط المقال علي الفيس بوك
ــــــــــــــــــــــــــــــــــــــــــــــــــــــــــــــــــــــــــــــــــ
الشهور التلاته الأخيره كل يوم تقريبا رايح التحرير أو رايح ندوة أو رايح لقاء جماهيري بشخصية سياسية أو رايح أقعد علي كافيه البورصه أتكلم مع أعظم جيل فمصر جيل الثورة الشعبية أو رايح اعتصم قدام ماسبيرو أو اجمع توقيعات لمحاكمة الثلاثي المرح والبيج بوص بتاعهم ...
...................
وكل يوم مختلف عن التاني في أسبابه اللي بتخرجني ونتايجه اللي بتتحقق ...
لكن كل يوم كان في شيء واحد بس ثابت ... بشوفه كل يوم ... وبسلم عليه كل يوم وانا واقف مستني الميكروباص اللي هيوديني القاهره ....
ــــــــــــــــــــــــــــــــــــــــــــــــــ
إزيك ياعم حسن ...
إزيك انت ياأستاذ محمد ويبتسم ابتسامته الجميله ويقولي .. إنت نازل مصر ؟
ـــــــــــــــــــــــــــــــــــــــــــــــــــــ
أسف . أعرفكم بعم حسن ...
عم حسن ده جارنا من زمان أوي . أنا اتولدت لاقيته جارنا راجل طيب ومؤدب أوي ..
عنده خمس أولاد ومراته خالتي نعمات ..
ولدين و3 بنات أكبرهم كريمة بنته 22 سنه خريجة بكالوريوس تربية لغة إنجليزية ...
فرحان بيها أوي هو أفنى حياته علشان يعلم ولاده ...
بس الولدين هيثم ورضا مش متعلمين بيقولي مش قادر أصرف عليهم ياأستاذ محمد إنت حضرتك عارف كل حاجه بقت غاليه أوي اليومين دول ...
ـــــــــــــــــــــــــــــــــــــــــــــــــــــ
المهم من كام يوم كدا وانا واقف فمحطة الميكروباص مستني أركب لقيت عمي حسن قلتله أنا المرادي بقه بصوت عالي
تيجي معايا مصر ياعم حسن ؟
فابتسم تاني وقالي وهو متردد " هقولكم ليه كان متردد في السطور اللي جايه "
أمممم طيب طيب حاضر ياأستاذ محمد حاضر هاجي معاك حاضر ربنا يكرمك يابني روح ...
ـــــــــــــــــــــــــــــــــــــــــــــــــــــ
ركبنا جمب بعض وجيت ادفعله حط إيده فجيبه وقعد يحلف يدفعلي قلتله لأ ياعم حسن أنا اللي قلتلك تعالي معايا يبقى أنا اللي ادفعلك ماشي ؟
قالي اللي تشوفه ياأستاذ محمد ربنا يكرمك ...
قلتله أنا عازمك النهارده طول اليوم علي حسابي ياعم حسن هنروح شوية مشاوير مع بعض وبعدين نخرج نتمشي شويه وبعدين نروح بيوتنا بقه إيه رأيك ؟
ـــــــــــــــــــــــــــــــــــــــــــــــــــــ
قالي بس يابني معلش انا لازم انزل أصلي نسيت اعمل حاجه في البيت ولزمن ارجع اعملها عشان البنات في البيت لوحدهم ...
قلتله ياعم حسن من إمتى وحد فبلدنا " قريتنا " بيخاف علي بناته ؟
إيه ياعم حسن بناتك البلد كلها عارفاهم ومحدش يقدر يبصلهم نص بصه ولا انت اللي عايز ترجع علشان البنات بيدلعوك بقه ياحج ؟
مضحكش من كلامي ولقيت وشه أحمر جدا ومرتبك وبيقولي أصلي ماهو يابني الـــ ممممم ونبي سيبني انزل يابني لو بتحب ربنا سيبني انزل !!!!!!!!!!!!!!
ــــــــــــــــــــــــــــــــــــــــــــــــــــ
أنا كالعاده في منتهى الغباء لم التفت لتوتر عم حسن ولم أعي ما الموضوع بالضبط ...
لقيته بيمد إيده فجيبه وبيطلع شوية جنيهات تقريبا ثلاث أو أربع جنيهات وبيقولي طب خلي دول معاك وانا لما ارجع البيت هبقي اديلك بقية فلوسك بس يعني اصبر عليا يومين كدا ولا حاجه ماشي ياأستاذ محمد ؟
" عم حسن كان متردد في الأول ومرتبك علشان ممعهوش فلوس ولإنه عنده كرامه رغم إنه مش متعلم وفقير جدا وشغال نقاش ومبيقدرش يشتغل لإنه كبر فكان بيشتغل سواق عند واحد صاحب شركة كبيرة..
ـــــــــــــــــــــــــــــــــــــــــــــــــــــ
المهم قالي ياإما كدا يا إما هنزل ... قلتله طيب حاضر خلاص خلي الجنيهات معاك وانا هاخد منك اللي هصرفه عنك واحنا خارجين النهارده لما نرجع اتفقنا ؟
رغم إني مش هاخدهم منه أبدا لكن قلتله كدا علشان يرضي يخرج معايا ..
فقلي خلاص ماشي ياأستاذ ..
ـــــــــــــــــــــــــــــــــــــــــــــــــــــ
وصلنا لميدان التحرير كنت رايح اشارك في الإعتصام اللي بيطالب بإقالة المجلس العسكري اعتصمنا مع الناس حوالي 3 ساعات وقعدت أقول يسقط المشير يسقط المشير وعمي حسن واقف يترعش جمبي وبيقول زيي ...
ـــــــــــــــــــــــــــــــــــــــــــــــــــــ
قلتله يلا ياعم حسن بقه هوديك حته تقعد مع شوية شباب زي الفل هوريك الشباب اللي عمل الثورة...
فاتبسط أوي وضحك وقالي بجد ؟ قلتله آه بجد ..
قالي يعني هم دول العيال اللي خلوا حسني مبارك يمشي ؟
قلتله آه هم دول .. وهمست فودنه وقلتله بس مش عيال ياعم حسن أوعى تقول قدامهم كدا ليضربونا وضحكت ...
فاتخض أوي وفضل يعتذر طول ماحنا ماشيين ويقولي والله ياستاذ محمد أنا اقصد العيال يعني زي العيال ولادي يعني ..
دنا مبسوط أوي من اللي هم عملوه ..
بس يارب يعرفوا يجيبوا الفلوس من كل الحراميه الكبار اللي سرقوا البلد خلينا نعرف ناكل ونشرب ...
أنا آسف ياأستاذ محمد وحياة ربنا ياأستاذ ما تزعل أنا مدب ومبفهمش وبخبط كلام زي الدبش إنت حضرتك في العلام وتفهم عني وحياة ربنا ما تقولهم إني قولت عليهم عيال علشان ميزعلوش دول مات منهم شباب زي الورد كتير ومخافوش ... دول رجاله والله مش عيال ..
فخجلت جدا من عم حسن وقلتله والله ياعم حسن مش زعلان ولا هم حتي لو عرفوا هيزعلوا انا بهزر معاك ياراجل يابركه متزعلش إنت مني ...
المهم فضل يدعيلي لحد ما وصلنا
ـــــــــــــــــــــــــــــــــــــــــــــــــــــ
وصلنا قهوة البورصة دخلت انا وهو وسلمت علي كل النشطاء اللي موجودين وبدأنا نتكلم ونتناقش وننظر ونتهجم ونتهكم وشوية شعر علي شوية أغاني وطنية ...
وعم حسن قاعد جمبي مبينطقش ومفتح عيونه ومذبهل وبيقولي
الناس دي انا بشوفها في التليفزيون ياستاذ محمد ..
قلتله آه ياعم حسن في منهم ناس بتطلع في التليفزيون اللي هناك ده واللي هناك دي فقالي عايز اسلم عليهم ونبي ..
فقلتله عنيا الاتنين وخدته ورحنا ليهم وعرفتهم بيه وخليتوا يسلم عليهم ...
عم حسن كان هيطير من الفرح أنا كنت مستغرب هو في إيه ؟
عم حسن ماله ؟ عايز يبوس ايدي ويقولي ربنا يكرمك يابني طول عمري بقول عليك بيه وافندي وابن ناس وأمير وابن حلال ربنا يكرمك ربنا يكرمك ...
أممممممممممم فضلت مش فاهم حاجه بس مش عايز افرج عليا الناس في القهوه وقلتله طيب خلاص ياعم حسن في ندوة دلوقتي مع المستشار طارق البشري تيجي معايا ؟ ..
قالي نصلي المغرب طيب قبل ما نروح قلتله طبعا نصلي تعالي بقه هخليك تصلي مع الشيخ ...................................
ـــــــــــــــــــــــــــــــــــــــــــــــــــــ
الراجل كان هيغمى عليه من الفرحه قالي ونبي بجد ياستاذ ؟
قلتله آه هو بيخطب النهارده في مسجد النور بالعباسية بين المغرب والعشا يلا عشان نلحق رحنا حضرنا الخطبه وعم حسن فضل يحارب في الزحمه علشان يروح يسلم علي الشيخ محمد ويبوس إيده ويقوله إدعيلنا ونبي ياشيخ محمد ربنا يرزقني بشغلانه علشان خاطر عيالي فالشيخ محمد وطي عليه وشوشه فسألته بعد ما خرج هو الشيخ كان بيقولك إيه ؟ ..
قالي الشيخ محمد الله يكرمه قالي بلاش والنبي دي ياحج انطق الشهاده ويستحسن تبقى تغتسل لما تروح وترد إيمانك بالشهاده ..
قلتله آه طيب ..
ــــــــــــــــــــــــــــــــــــــــــــــــــــ
أخدته بعد صلاة العشا ورحنا الندوة بتاعة دكتور طارق البشري وبعض مرشحي مصر لانتخابات الرئاسة
أول ما دخل كان خايف يدخل أقوله ياعم حسن ادخل متخافش مالك ...
يقولي ياستاذ محمد خزيان " مكسوف " علشان هدومي مش ولابد يعني والناس دول كبارات البلد يعني ميصحش أقعد معاهم
طيب خش إنت ياستاذ وانا هستناك هنا ..
قلتله لأ طبعا هتدخل معايا وبعدين بلد مين ؟ مصر ؟ طيب ما مصر بلدك كمان ياعم حسن أدخل دول ناس محترمين أوي متقلقش ...
فدخل بعد معاناه ... وقلتله طيب أنا هعمل معاك أحلى واجب بقه ....
قالي ونبي مش كل شوية تخضني ياأستاذ محمد هتعمل إيه هتعمل إيه قلتله تعالي هخليك تسلم عليهم كلهم واحد واحد ...
ده بلال فضل وده عم حسن ... ده د . ضياء رشوان .. ده أ. ابراهيم عيسى ... ده د عمرو حمزاوي .. ده وده وده وده وده وده
المهم عرفته علي كل الناس بما فيهم د طارق البشري وخليته يسلم عليه وهو علي المنصه قبل ما يتكلم ...
عم حسن كان في حالة ذهول هو ميعرفش ولا واحد من اللي سلم عليهم لا عمره مثلا قرأ لبلال فضل ولا استمع للتحليلات الرائعه لدكتور عمرو حمزاوي ولكن يعرف أشكالهم كلهم فقط ..
كان بيقول لكل واحد يسلم عليه أنا كنت بتفرج عليك في التليفزيون انا ومراتي والعيال وبنحبك أوي يافندي
والناس كانت فمنتهى الذوق وكانوا بيبتسموا بهدوء ويردو تحية عم حسن بتحبة أطيب منها ...
ـــــــــــــــــــــــــــــــــــــــــــــــــــــ
خلصت الندوه وخرجنا وبدأت عباءة الليل تكسو المدينة " القاهره " ونبي حلو الكلام دلهوك أوي أنا بايني شاعر ولا إيه
واخدت عم حسن وقلتله فسحه بقه ياباشا ونزلنا علي كورنيش النيل اتمشينا واتعشينا
وشربنا لحد ما تعبنا " حاجه ساقعه وربنا مش أكتر "
ـــــــــــــــــــــــــــــــــــــــــــــــــــــ
نروح بقه ياعم حسن ؟
ما تخلينا شوية ياأستاذ محمد ونبي دانت الخروج معاك زي العسل إبقى خدني معاك كل ما تيجي هنا بقه
هههههههههههههه حاضر ياعم حسن عنيا الإتنين بس كدا ؟ إنت تأمر كل مره هاخدك معايا ...
ـــــــــــــــــــــــــــــــــــــــــــــــــــــ
ركبنا الميكروباص ونزلنا شبرا ومن شبرا ركبنا الميكروباص ونزلنا طوخ ومن طوخ ركبنا لحد القرية بتاعتنا ...
ـــــــــــــــــــــــــــــــــــــــــــــــــــــ
وصلنا عند البيت ..
لقيت عم حسن زي ما يكون عايز يقولي حاجه بس مكسوف وحاسس انه بيتراجع ومتردد ومش قادر يتكلم
قلتله خير ياعم حسن في حاجه انتبه وقالي لا لا لا سلامتك ياأستاذ مفيش والله حاجه مفيش أي حاجه ...
سكت شويه وقلتله طيب مفيش مشكله لو حسيت إنك عايز تتكلم معايا ابعتلي أي حد وانا آجي لحد عندك
قالي سلامو عليكو وبيداري وشه مني كأنه مش قادر يواجهني باللي جواه مش عارف ليه حاسس إنه عايز يقول حاجه ..
ـــــــــــــــــــــــــــــــــــــــــــــــــــــ
إيييييييييييييييه اتنهدت ودخلت بيتنا وأخدت حمام ولبست البرنس وجبت النضاره وجبت كتاب إسمه " الفرق بين الدولة المدنية والدينية "
وكنت كل شويه آخد ريست وافتح مقطع فيديو بيتكلم عن فصل السلطات الثلاث
ـــــــــــــــــــــــــــــــــــــــــــــــــــــ
جرس الباب بيرن
مين ؟
أنا عمك حسن ياأستاذ محمد
فتخت الباب اتفضل ياعم حسن
خير !!!
قالي أنا عايز حضرتك فموضوع كدا باأستاذ محمد معلش استحملني أنا عارف إنك تعبان ووراك مشغوليات كتير هي دقيقه واحده وهمشي
قلتله اتفضل ياعم حسن عيب تقول كدا اتفضل اتكلم أنا سامعك
عم حسن بيترعش ومتوتر ووشه أحمر والخجل متمكن منه وبيقولي بصوت مبحوح ... آه إيه أستاذ محمد أنا مش زعلان والله
أنا مبسوط والله إن حضرتك خدتني معاك النهارده والله أنا مبسوط اوعي تزعل من اللي هقوله
مالك ياعم حسن ؟ اتكلم انا سامعك
أصلي " وابتسم ابتسامه تقريبا كأنه بيبكي " أصلي يعني كنت فاكر حضرتك واخدني يعني معاك مصر يعني عشان تشغلني أو يعني تشوفلي شغلانه عندكم أو أو بس انا مبسوط والله مبسوط والله مش زعلان منك إنت ابن حلال ويلا معلش بقه خيرها فغيرها ...
ـــــــــــــــــــــــــــــــــــــــــــــــــــــ
بدأت عيون عم حسن تدمع وهو بيقول وبمنتهى الحياء
لو تقدر حضرتك ياأستاذ محمد تكلملي حد من الناس الواصلة اللي انت خليتني اسلم عليهم النهارده دول يبقي كتر خيرك ومش هنسالك جميلك أبدا
معلش أنا عارف إني بتقل عليك بس يعني الظروف مش ولابد ومصاريف العيال كتير ....
مبقتش عارف ارد ولا اقول أي حاجه
ـــــــــــــــــــــــــــــــــــــــــــــــــــــ
قلتله ياعم حسن حاضرعنيا الاتنين أنا كلمتلك ناس منهم والله النهارده وقالولي هيردوا عليا قريب "بكدب طبعا "
وهكلملك الباقي إن شاء الله دلوقتي حالا متقلقش وسيبها علي الله
قالي علي الله يابني كله مسلمها لله بس العيال صعبانين عليا
وقام خرج عم حسن وسابني غرقان فتوهه ما بعدها توهه
ـــــــــــــــــــــــــــــــــــــــــــــــــــــ
يااااااااااااااااااااااااااااااااااااااااااااااااااه
طب اعمل ايه دلوقتي ؟
الناس اللي فاعتصام التحرير بتوع الجمعه اللي فاتت كلهم شباب ونصهم معندوش شغل أصلا !!
واللي علي قهوة البورصه شرحه !!
والشيخ في المسجد قاله عم حسن ونبي ادعيلي اشتغل عشان العيال ياشيخ
الشيخ قاله متقولش ونبي تاني روح اغتسل وانطق الشهاده ومجبش سيرة الشغل !!
والندوة كل اللي فيها اللي صحفي واللي اعلامي واللي بتاع دستور
وعم حسن مش متعلم هيشتغل معاهم إيه بس ؟!!
وكلهم كانوا بيتكلموا في انتخابات الشعب والشوري والرئاسه والحملات والائتلافات والخلافات والمحاكمات ولا حد فيهم جاب سيرة عم حسن ولا خالتي نعمات
ــــــــــــــــــــــــــــــــــــــــــــــــــــ
أعمل إيه دلوقتي ؟
شوية وجتلي خالتي نعمات زوجة عم حسن تشتكيلي منه تقولي شفت ياأستاذ محمد الراجل اللي معندوش دم اللي سايبنا طول النهار وراجع اخر الليل يطوح إيد ورا وإيد قدام وبنته راقده في البيت بقالها أسبوع مش لاقيين لها حق الدوا ؟
ـــــــــــــــــــــــــــــــــــــــــــــــــــــ
أنا السبب ....... أيوه انا السبب ... محمد سعيد عطية بيومي هو السبب
مقضيها اعتصامات وخلافات وكتب وفيديوهات عن الديموقراطيه والليبرالية والدولة الدينية ومقرأتش ولا كتاب ولا شفت فيديو عن اقتصاد الغلابه المنهار !
قرأت كتب كتير عن ثورة الحرية بس مش مهتم أقرا ولا كتاب عن ثورة الجياع !
كنت كل يوم وانا خارج بفكر فمية حاجه إلا انت !
بخاف من مية حاجه إلا عليك !
برجع كل يوم بحل لمشكله إلا مشكلتك !
كل جمعة بخرج كاتب المطالب علي لوحة كبيره واصمم علي مطالبي بس انت دايما كنت برا اللوحه !
عاجز ومش قادر اساعدك ولا قادر احللك مشكلتك !
كل يوم باكل واشرب ومش عارف انت بتاكل وبتشرب ولا لأ !
مخدتش بالي لما طلعت الفلوس من جيبك واحنا في الميكروباص إنك كل الفلوس اللي فجيبك كانت كام جنيه وخمس أولاد وزوجه !
بحافظ بدمي علي كل جزء في الثورة إلا الجزء بتاعك انت !
ـــــــــــــــــــــــــــــــــــــــــــــــــــــ
عارف ياعم حسن إنك مبسوط من اللي عملناه وانا كمان مبسوط وهكمل ضغط من خلال المظاهرات المليونية أيام الجمع في حال تم التباطؤ في استرداد حقوقنا ..
بس انا زعلان إننا مش واخدين بالنا إننا لازم نشتغل وننتج ونوقف الإعتصامات والمظاهرات القئوية علشان اقتصادنا يقف علي رجليه وبلدنا تتعافي وانت كمان ترجع لشغلك وتقدر تأكل عيالك ..
ــــــــــــــــــــــــــــــــــــــــــــــــــــــــــــــــ
" لإنك المفروض إنك جزء من ثورتنا "
ـــــــــــــــــــــــــــــــــــــــــــــــــــــــــــــــ
مش واخد بالي إن مصر فيها 15 مليون عم حسن بيكسبوا رزقهم يوم بيوم ومسئول منهم أسرة متعلقة فرقبتهم وكتير مننا مش واخد باله !
ـــــــــــــــــــــــــــــــــــــــــــــــــــــ
انشغلت في محاكمات وان كنت عارف انها حقنا في القصاص من اللي قتلونا بس خايف تقوم ثورة جياع واحنا اللي نتحاكم فيها بعدين
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أنا آسف ياعم حسن ...
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
واوعدك اني هعمل فثورتي توازن يرجعلنا حقنا ويرجعك شغلك وتقدر تودي بنتك المستشفى
واوعدك اني هطالب بالقصاص من اللي نهبونا وقتلونا بإيدي اليمين ومش هسكت
وهبني بلدي واشتغل وانتج واساعد حضرتك وزيك كتير بإيدي الشمال ومش همل
ساعدوا عم حسن أرجوكم
رسالة من جار عم حسن ...
ليست هناك تعليقات:
إرسال تعليق
اترك تعليقك هنا ...