أنا زعلان بجد .. انتوا ليه بتحاكموا مبارك ؟
زعلانين منه ليه ؟
حاقدين عليه ليه ؟
هتموتوا وتنتقموا منه ليه ؟
عمل إيه مبارك يعني علشان تحاكموه ؟
ــــــــــــــــــــــــــــــــــــــــــــــــــــــــــــــــــــــ
- زور التاريخ وحط صورته مكان صورة الفريق سعد الشاذلي اللي وضع خطة حرب أكتوبر ونسب الفضل لنفسه فنصر 73 وطرد الشاذلي من مصر وكمان حاكمه عسكريا وسجنه ؟
طب ما إيه يعني اللي حصل يعني ؟ ما ناس كتير زورت إشمعنى هو يعني اللي يتحاكم نفسي افهم ؟
طب مانا بعمل حاجات في صور كتير بالفوتوشوب حد يقدر يحاكمني؟
عليا النعمه اللي هيحاكمني لانفخه أصلا .. إهدي وقول انا هديت ياعم مازنجر ..
وبعدين ماحدش حاكم اللي نفى سعد زغلول ليه يعني ؟ ها .. ها ؟
ــــــــــــــــــــــــــــــــــــــــــــــــــــــــــــــــــــــ
- بتحاكموه علشان قال أول ما حكم مصر مش هحكم غير مدتين كحد أقصى وراح مخزوقنا 30 سنه ؟
طب ما إيه يعني بردك يعني ما هو ناس كتير بتكدب مش بتحاكموهم ليه بقه ؟
بياع الطماطم لما بيقعد كل يوم يدوشنا ويزعق ويقول مجنونه ياقوطه ( هو في قوطة عاقلة وقوطة مجنونه يعني ؟ ) مش بتحاكموا عشان بيكدب ليه ؟
بطلوا بقه حرام عليكم .
ــــــــــــــــــــــــــــــــــــــــــــــــــــــــــــــــــــــ
عشان معلقش علي 1300 شهيد ماتوا غرقانين في البحر ولا حتي صرف تعويضات لأهلهم وساعد ممدوح اسماعيل صاحب العباره المتهالكة اللي هي السبب الرئيسي فموتهم يهرب ؟
قال وإيه يقولك الدليل أهوك ..
http://www.youtube.com/watch?v=dd2alPfwzrI
ونبي ده دليل ده إنه بيتريأ ؟
وبعدين السبب فموتهم مش العباره ياذكي انت وهي السبب انهم مبيعرفوش يعوموا .. لما هم مش بيعرفوا يعوموا بيسافروا في البحر ليه ها هااااااااااااااا ؟ ...
وكمان مكانوش لابسين تقيل لما وقعوا في البحر فماتوا من البرد أصلا ؟
وممدوح اسماعيل هرب من المطار ؟ أوأو أكيد لأ طبعا ده تلاقيه هرب معرقش وماليش دعوه مش يمكن مخاوي جن أصلا وهو اللي هربه ؟
ياجماعه حرام عليكم بقه متحملهوش فوق طاقته ...
ــــــــــــــــــــــــــــــــــــــــــــــــــــــــــــــــــــــ
- بنحاكموه علشان حرامي ؟ وكان بيخصص 40 مليار جنيه لمؤسسة الرئاسة لوحدها وعشان باع البلد ( بإسم الخصخه) ، وعشان كل الحكومات اللي عينها فعهده كانت بترجع مصر لورا قدام عنيه ؟
طب ما إيه يعني بردك ... الله !
طب هو مش كل واحد متجوز واحده بيخصصلها مصروف للبيت وكدهوك يعني ؟
طب اشمعنى هو ميخصصش يعني ها ؟ وبعدين ايه اربعين مليار يعني ولا بيدرجوا في تقرير الموازنة ولا بيسمح بمناقشتهم في مجلس الشعب يعني ؟
انتوا شعب جعان وعريان ملط وغريب بجد أصلا
ــــــــــــــــــــــــــــــــــــــــــــــــــــــــــــــــــــــ
- بتحاكموه علشان حكم تلاتين سنة وكان عايز يورث البلد لابنه جيمي ؟
طب ما إيه يعني قلنا بقه يوووووووووووووووووووه بقه يووووووووووووووووووه بقه
اشمعنى انتوا يعني كل واحد بيموت أبوه بيورثه ومحدش بيحاكمكم ؟ ها ؟
ما ترد ياحلوه انتي وهو ..
ولا حلال عليكم وحرام علي الراجل الغلبان وولاده يعني ؟
ـــــــــــــــــــــــــــــــــــــــــــــــــــــــــــــــــــــ
- بتحاكموه علشان حظر الإخوان وشردهم وسحلهم واعتقل اعضاء 6 ابريل وكفاية وحزب الغد والجبهة والكرامة والجمعية الوطنية للتغيير وشباب الجامعات اللي بيتكلموا في سياسة بلدهم وبيستعملوا حقهم الطبيعي والمشايخ اللي تعارض وملأ المعتقلات بالناس البريئه فأمن الدولة وكل شريف بيطالب بحقه وكان بيخزوأهم ويسبلهم الدين ويشتم ربنا " سبحانه وتعالي " ويغتصب مرتاتهم قدام عنيهم وبدون محاكمات كمان ...
( واسألوني أنا يعني إيه أمن دولة ويعني إيه يبقى عندك عشرين سنة وتتعامل زي الجواسيس فبلدك لإني جربت الإحساس ده )
بتحاكموه علشان ممارسات أمن الدولة وجرايمه قتل واغتصاب وتعذيب واذلال تحت عنيه ؟
ونبي دي تهمه يعني ؟
وهو ليه الناس اللي فوق دي تتدخل في سياسة بلدها يعني هي كانت بلدهم ؟
وليه بيعملوا ناصحين يعني وهم اللي فاهمين في الشعب يعني كان شعبهم يعني ؟
كان شعبك ياكابتن ؟
ده شعبه هو وهو اللي لاقاه ، وقلعه هدومه وحماه ، وميجراش يعني لما ضربوا كام قلم علي قفاه ، وادالوا كام شلوت وكام بونيه فوشه لحد ما عماه ...
دانتو ناس غريبه ياااااه عليكو يااااااه
بتحاكموه ليه بقه ونبي ها ؟
ـــــــــــــــــــــــــــــــــــــــــــــــــــــــــــــــــــــ
- أعطى أوامر بقتل المتظاهرين في الثورة ؟
إيش عرفكم بقه إن هو اللي أعطى الأوامر يعني ؟
حتى لو هو الرئيس الأعلى لجهاز الشرطة وهو اللي بيعين وزير الداخلية وهو اللي بيشيله بردك بردك إيش عرفكم إن هو اللي قاله ؟
مش ينكن وزير الداخلية دهوك شغال وزير داخلية الصبح عند مصر وبالليل بيشتغل وزير في بلد الأعداء ؟
ها ؟ ممكن ولا موش ؟ قولوا الصراحه ممكن ولا موش ؟
قولتولي مونكن .. طيب مش ينكن البلد التانيه بتاعة الأعداء دي الرئيس بتاعها هو اللي قاله اضرب ياحبيب قاله ياريس لو الثورة نجحت هينفخونا ياريس ...
قاله ياراجل اضرب دا ضرب الحبيب زي أكل الزبيب وراح الوزير الشرير دهوك ضارب الناس وقاتلهم ومبارك ملهوشي ذمب فحاجه ؟
مونكن ولا مش مونكن قولوا الصراحه انا عارفكم شعب كداب كدب الإبل بس هتقولوا الصراحه عشان تنقذوا الراجل البريء ده .. يلا قولوا بقه
ــــــــــــــــــــــــــــــــــــــــــــــــــــــــــــــــــــــ
- بتحاكموه عشان قتل 846 مصري وأصاب أكتر من 6 آلالاف مصري في أربع أيام ؟
أهو عرفتوا إن انتوا شعب مخه ضلم أصلا !!!
بتسألوا السؤال تاني ليه بقه ياشوية أغبية .. هوف بقه ..
بس أنا مش هسكت هجاوبكم بردك ..
إيش عرفكم مش بنكن مثلا عمر سليمان هو اللي قال للظباط اضربوا والرئيس مثلا مكنش موجود أو عنده ضيوف أو مثلا في الحمام بيعمل زي الناس ولا هو مش ناس يعني ؟
أو مثلا مش ينكن حد مثلا لبس وش زي بتاع بابا مبارك وقال لوزير الداخلية اضرب ؟
لأ بصوا ... مش ينكن مثلا الناس اللي ماتت دي تكون ماتت من الخضه ؟
حد فيكوا شاف الطلقات ؟
مش ينكن الجزيره والعربية وبي بي سي وقنوات العالم اتفقت تذيع مقاطع من أفلام الأكشن الأمريكاني دلهيك وتقول عليها إنها الثورة فمصر علشان نكره بابا مبارك ونقول عليه شرير ؟
مونكن ولا موش قولوا يلا مونكن ولا موش بس بصراحة الله يحرقكم بقه
أو يكونوا مثلا الممثلين والمخرجين بتوع السيما اللي نزلوا الثورة جابوا ناس ولبسوهم ظباط وعساكر وجابوا دم علي هدوم الممثلين عشان يضحكوا ع الناس مش ده بيحصل في السيما ، إشمعنى يعني محدش بيحاكم أي رئيس أو ظابط لما بيموت الممثلين في التليفزيون ويعمل في مرتاتهم قلة أدب يعني ولا هو مبارك الحيطة المايلة بتاعتكم ؟ اتقوا الله
ــــــــــــــــــــــــــــــــــــــــــــــــــــــــــــــــــــــ
- علشان مصر فيها 37 مليون شخص تحت خط الفقر وواحد في المليون من الشعب هو اللي بيتحكم في باقي الغنم ومرتب حبيب العادلي مثلا لوحده كان مليون ومية الف جنيه غير البدلات والمصاريف السرية ؟
بطلوا فذلكة ونبي ...
حد فيكوا عد الفقرا يعني ؟
وبعدين حبيب العادلي دلهوك مش الرئيس اللي عينه وحدد مرتبه قصدي لالالالالالالالا الــ آه المهم يعني انا هقولكم الحقيقه
عليا النعمه الفقرا اللي بالملايين فمصر دلهمك قلة مندسة وقاصدين يطعولنا زي الشحاتين كدهوك علشان يخربوها ..
طب بذمتكم قولوا الصراحة
لما 70 % من الشعب المصري ناكر الجميل دهوك يكون بيقبض من 150 : 500 جنيه عايزين إيه تاني بقه ؟
اذا كان اللبان الدكر بشلن احسبوا انتوا بقه المرتب يجيب كام علبة لبان دكر ما تحسبوها ولا هتقولوا مبنعرفش نحسب بقه دلوقتي ؟
ايوا ايوا بانوا علي حقيقتكم منكم لله مشيتوا بابا وكمان عايزين تدخلوه الكراكون ...
ــــــــــــــــــــــــــــــــــــــــــــــــــــــــــــــــــــــ
- مش هطول عليكم بس هقولكم اخر حاجه وحكموا ضميركم
عهد مبارك فيه إيه يعني يستدعي انكم تحاكموه ؟
فساد مالي وإداري فكل قطاعات البلد ؟
الشرطة كانت بتعامل الناس زي الغنم وبتضربهم بالجزم ؟
أمن الدولة كان بينفخ أي حد يقول كلمة حق عن عهد الظلم ويكهربه ويغتصب مراته قدامه ويقلعه عريان ملط ويرميه في الصحرا ؟
كان أي شخص مشهور يعارض يتحبس " ابراهيم عيسي" أو يتوقف برنامجه " عمرو أديب " أو يتنفي " حمدي قنديل " أو تزيد شعبيته يترفع ويتبعت انكلترا " عمرو خالد " ؟
دين مصر الداخلي والخارجي تريليون جنيه و80 مليار جنيه ؟
حكمنا تلاتين سنه بالاستفتاء المزور واخيرا الانتخابات المزوره ومكانش بيدي أي كلب فرصه واحده ينافسه ؟ ولما حاول واحد ينافسه سنة 2005 لفقله قضيه وسجنه ؟
كان عايز ابنه يورثنا ؟
سجن عشرات الالاف من المظلومين وقتل مئات المسالمين ؟
كان بيصدر الغاز لاسرائيل بربع تمنه واحنا عندنا ازمه في الانابيب ؟
كان بيحرك الفتنه الطائفيه كل ما يحب يشغل الناس عن شيء معين ؟
محققناش أي انتصار في عهد إلا في أمم إفريقيا ؟
30 سنه ومفيش ولا مشروع قومي ناجح ؟
سافر فعهده خارج مصر أكثر من 20 مليون مصري للعمل خارج مصر بالتبادل من ضيق العيش فمصر ؟
أفسد واختار فاسدين أفسدوا وهو تستر ؟
شارك في قتل اطفال غزه لما حاصرهم ؟ وعمره ما عمل حاجه ولا خد قرار من أجل المسجد الأقصى إلا كله كلام كلام كلام وكان بيشجب ويدين زيه زي رئيس دولة بنين ؟
كان بيسيب علينا البلطجية في الجامعات لما نعمل مظاهره وعلي الصحفيات يقطعولهم هدومهم قدام نقابة الصحفيين ويهدد أي حد عايز يقول لأ ؟
قتل المصريين في الثورة بدم بارد وكان بيقول عليهم شهداؤكم ؟
بالله عليكم ياحتة شعب لوكال ياشوية ظلمة ياشريرين ياللي معند كمش غير لوكلوك لوكلوك لوكلوك بس وخلاص
دي تهم تستحق المحاكمة ؟
ردوا ردوا ولا الحقيقه عمت عنيكوا وبلعتكوا لسانكوا وقهرتكم ؟
ــــــــــــــــــــــــــــــــــــــــــــــــــــــــــــــــــــــ
كتبه محمد بيومي http://www.facebook.com/#!/mohamed.baioumy?sk=notes
ــــــــــــــــــــــــــــــــــــــــــــــــــــــــــــــــــــــ
<Photo 1>
ليست هناك تعليقات:
إرسال تعليق
اترك تعليقك هنا ...